Bugun.tv xəbər verir ki, NATO-nun baş katibi Yens Stoltenberq Kosovodakı gərginliklə bağlı verdiyi açıqlamada, “Qərbi Balkanlar üçün Əməliyyat Ehtiyat Qüvvələrindən daha 700 əsgər göndərmək qərarına gəldik” deyib.
Norveçin paytaxtı Osloda Müttəfiq Xarici İşlər Nazirlərinin qeyri-rəsmi toplantısından əvvəl Kosovo ilə bağlı alınan qərarları açıqlayan Stoltenberq, “NATO qüvvələri KFOR Kosovoda bütün vətəndaşlar üçün təhlükəsiz mühitin təmin edilməsi üçün bütün lazımi tədbirləri görəcək. Biz Birləşmiş Millətlər Təşkilatının mandatlarına uyğun olaraq qərəzsiz hərəkət etməyə davam edəcəyik. Biz Qərbi Balkanlar üçün Əməliyyat Ehtiyat Qüvvələrindən daha 700 əsgər göndərmək qərarına gəldik. Biz əlavə ehtiyat qüvvə batalyonunu da hazır vəziyyətə gətirmişik ki, ehtiyac yaranarsa, onlar yerləşdirilsin.
Bunlar KFOR-un öz mandatını yerinə yetirmək üçün lazım olan güc və imkanlara malik olmasını təmin etmək üçün ehtiyatlı addımlardır”.
Mənbə: İLKHA