Bugun.tv xəbər verir ki, insanların təxminən 10 faizi solaxay doğulur və alimlər hesab edirlər ki, bunun əsas səbəbi genetik xüsusiyyətlər və dölün ana bətnində inkişaf prosesidir.
Mütəxəssislərin sözlərinə görə, insan beyninin sağ və sol yarımkürələri bədənin hərəkətlərini fərqli şəkildə idarə edir. Sağ əli daha çox beynin sol yarımkürəsi, sol əli isə sağ yarımkürəsi nəzarətdə saxlayır. Bəzi insanlarda bu inkişaf prosesi fərqli getdiyi üçün onlar solaxay olurlar.
Araşdırmalar göstərir ki, irsiyyət də mühüm rol oynayır. Valideynlərdən biri və ya hər ikisi solaxay olduqda, uşağın da solaxay olma ehtimalı artır. Bununla yanaşı, alimlər hesab edirlər ki, ana bətnində hormonların təsiri və dölün inkişaf xüsusiyyətləri də əl üstünlüyünün formalaşmasına təsir göstərə bilər.
Mütəxəssislər vurğulayırlar ki, solaxaylıq nə xəstəlik, nə də qüsurdur. Bu, beynin inkişafının təbii müxtəlifliyinin bir formasıdır. Dünyada elm, incəsənət və idman sahəsində uğur qazanmış çoxlu sayda solaxay insanlar var.
Müasir dövrdə ekspertlər uşaqları məcburi şəkildə sağ əllə yazmağa və ya işləməyə öyrətməyi düzgün hesab etmirlər. Onların fikrincə, bu cür müdaxilə uşağın öyrənmə və psixoloji rahatlığına mənfi təsir göstərə bilər.