OpenAI şirkəti ChatGPT platformasında planlaşdırılan “böyüklər rejimi”nin istifadəyə verilməsini təxirə salıb. Şirkət bu qərarı daha yüksək prioritetli texnoloji inkişaflara diqqət yetirmək istəyi ilə izah edib.
Şirkətin baş icraçı direktoru Sam Altman daha əvvəl yaş yoxlama sistemi tətbiq edildikdən sonra platformada yetkin istifadəçilər üçün xüsusi məzmun imkanlarının yaradılacağını açıqlamışdı. Lakin OpenAI hazırda ChatGPT-nin funksiyalarını və performansını yaxşılaşdırmağa üstünlük verdiyini bildirib.
Şirkətin məlumatına görə, hazırda əsas diqqət süni intellektin daha ağıllı işləməsi, istifadəçi təcrübəsinin yaxşılaşdırılması və fərdiləşdirmə imkanlarının artırılmasına yönəlib.
OpenAI həmçinin qeyd edib ki, platformanın yetkin istifadəçilərə uyğunlaşdırılması ideyasından imtina edilməyib, lakin bu funksiyanın düzgün şəkildə tətbiqi daha çox vaxt tələb edir.
ChatGPT-də yaş yoxlama sistemi tətbiq olunur
Şirkət hazırda istifadəçilərin yaşını müəyyən edən xüsusi texnologiya üzərində işləyir. Sistem istifadəçinin 18 yaşdan kiçik olduğunu müəyyən edərsə, əlavə təhlükəsizlik tədbirləri tətbiq olunur. Bu tədbirlər qrafik zorakılıq və həssas məzmunlara çıxışı məhdudlaşdırır.
Böyük Britaniyada qüvvədə olan Online Safety Act qanununa əsasən, əgər platforma pornoqrafik məzmun yaradırsa, həmin məzmun yalnız ciddi yaş yoxlamasından keçmiş istifadəçilər üçün əlçatan olmalıdır.
Şirkətdə istefa və Pentaqon müqaviləsi
Digər tərəfdən, OpenAI-nin robototexnika bölməsinin aparat rəhbəri Caitlin Kalinowski ABŞ Müdafiə Nazirliyi ilə bağlanan müqavilə fonunda istefa verib.
Kalinovski bildirib ki, süni intellekt texnologiyalarının kütləvi nəzarət və ya insan müdaxiləsi olmadan istifadə edilən silah sistemlərində tətbiqi ciddi etik müzakirələr tələb edir.
OpenAI isə açıqlamasında bildirib ki, şirkət Pentaqonla əməkdaşlıq çərçivəsində süni intellekt texnologiyasının daxili kütləvi nəzarət və muxtar silah sistemləri üçün istifadə edilməsinə icazə verməyəcək.
Şirkət həmçinin əlavə edib ki, süni intellektin milli təhlükəsizlik sahəsində məsuliyyətli şəkildə tətbiqi üçün hökumətlər və vətəndaş cəmiyyəti ilə müzakirələr davam etdiriləcək.
Mənbə: The Guardian