Pakistanın paytaxtı İslamabadda cümə namazı zamanı məsciddə həyata keçirilən hücum nəticəsində ölənlərin sayı 38 nəfərə çatıb.
Dawn qəzetinin Pakistan Tibb Elmləri İnstitutu (PIMS) və digər xəstəxanalara yerləşdirilən xəstələrin qeydlərinə əsasən yaydığı məlumata görə, hücumdan sonra müalicə alan bəzi yaralıların həyatını itirməsi nəticəsində ölənlərin sayı artıb.
Rəsmi şəxslər hücum nəticəsində həyatını itirənlərin sayının 38 nəfərə yüksəldiyini bildirərək, xəstəxanalarda müalicəsi davam edən bəzi yaralıların vəziyyətinin ağır olduğunu və ölənlərin sayının arta biləcəyini qeyd ediblər.
Yaralıların aparıldığı İslamabad Poliklinika Xəstəxanasında, eləcə də PIMS və CDA Xəstəxanasında “fövqəladə vəziyyət” elan edilib.
Hücum şiələrə aid məsciddə baş verib
Xatırladaq ki, 6 fevral tarixində İslamabadın Shehzad Town bölgəsində yerləşən və şiələrə aid olduğu bildirilən İmam Bargah məscidində cümə namazı zamanı partlayış baş vermişdi.
İlkin məlumatlara görə, partlayış nəticəsində 36 nəfər ölmüş, 160-dan çox yaralı isə xəstəxanalara yerləşdirilmişdi.
Pakistanın xarici işlər naziri Məhəmməd İshaq Dar sosial şəbəkədə verdiyi açıqlamada partlayışın intihar hücumu nəticəsində baş verdiyini bildirərək hücumu qınayıb.
Rəsmilər ilkin araşdırmaların nəticəsində hücumçunun DEAŞ terror təşkilatı ilə əlaqəli olduğunu və dəfələrlə Əfqanıstana səfər etdiyini qeyd ediblər. Bildirilib ki, hücuma DEAŞ-la əlaqəli qrup məsuliyyəti öz üzərinə götürüb.
Pakistan Daxili İşlər Nazirliyi isə Hayber Paxtunxva əyalətinin Peşaver və Nowshera bölgələrində keçirilən paralel əməliyyatlar zamanı hücumla əlaqəli 4 şübhəlinin saxlanıldığını açıqlayıb.
Nazirliyin yaydığı məlumatda qeyd olunub ki, hücumu planlaşdırma, təlim və yönləndirmə prosesləri DEAŞ tərəfindən Əfqanıstanda həyata keçirilib.
Mənbə: TrtHaber