Bugun.tv xəbər verir ki, Pekin ABŞ-nin “TikTok” sosial şəbəkəsinin qadağan edilməsi ilə bağlı cavab tədbirləri görəcək. Çin Ticarət Nazirliyinin rəsmi nümayəndəsi He Yadun bu barədə jurnalistlər üçün təşkil olunan brifinqdə deyib. Onun sözlərinə görə, Vaşinqton xarici kompaniyalara “əsassız təzyiqləri” dayandırmalı və “ABŞ-yə sərmayə yatıran bütün ölkələrin şirkətləri üçün açıq və ədalətli mühit”i təmin etməlidir.
Xatırladaq ki, ABŞ Konqresinin Nümayəndələr Palatası “TikTok” sosial şəbəkəsinin qadağan edilməsi ideyasını dəstəkləyib. Qanunvericilər sosial şəbəkəni satmaq üçün “ByteDance” kompaniyasına altı ay vaxt verilməsini təklif ediblər. Bundan sonra təşəbbüs baxılması üçün Senata göndəriləcək. Prezident Cozef Bayden bundan əvvəl müvafiq qanun layihəsini imzalayacağını deyib.
Qeyd edək ki, 2017-ci ildə istifadəyə verilən “TikTok” tətbiqinin beynəlxalq versiyası 2018-ci ilin avqustunda bazara çıxıb. Çin kompaniyasına məxsus sosial şəbəkənin Birləşmiş Ştatlar üçün təhlükə yaratdığını iddia edən ABŞ administrasiyası onun qadağan edilməsinə çalışır. Vaşinqtonun fikrincə, həmin tətbiq Çin hakimiyyəti və kəşfiyyat xidmətləri üçün məlumat toplama alətidir.
Müxbir: Şəms Elnurqızı