Bugun.tv– xəbər verir ki, bu gün İlham Əliyev İnqa Ruqinieneni qəbul edib.
Görüş zamanı Azərbaycan ilə Litva arasında münasibətlərin inkişafı, iqtisadi-ticari əməkdaşlığın genişləndirilməsi və bir sıra strateji sahələrdə yeni imkanlar müzakirə olunub.
Prezident İlham Əliyev Litva Baş nazirinin səfərinin ikitərəfli əlaqələrin inkişafına töhfə verəcəyinə ümid etdiyini bildirib. İnqa Ruqiniene isə Azərbaycanla Litva arasında uzun illərə söykənən yaxşı münasibətləri məmnunluqla qeyd edib.
Danışıqlarda enerji, investisiya, təhsil, kənd təsərrüfatı və digər sahələrdə əməkdaşlığın genişləndirilməsi məsələləri diqqət mərkəzində olub. Həmçinin qarşılıqlı nümayəndə heyətlərinin səfərlərinin artırılmasının vacibliyi vurğulanıb.
Litva Baş naziri Azərbaycanla Ermənistan arasında sülhün bərqərar olmasına görə təbriklərini çatdırıb və regionda sabitliyin vacibliyini qeyd edib.
Görüşdə Prezident İlham Əliyev regionda sülh təşəbbüsünün məhz Azərbaycanın irəli sürdüyünü bildirib. Dövlət başçısı həmçinin azad olunmuş ərazilərdə genişmiqyaslı bərpa işlərinin aparıldığını, keçmiş məcburi köçkünlərin geri qayıdışının təmin edildiyini diqqətə çatdırıb.
Qeyd olunub ki, artıq 30 minə yaxın keçmiş məcburi köçkün öz doğma yurdlarına qaytarılıb. Bununla yanaşı, işğaldan azad edilmiş ərazilərdə mina problemi bərpa prosesini çətinləşdirən əsas amillərdən biri kimi göstərilib.
Tərəflər həmçinin beynəlxalq təşkilatlar çərçivəsində əməkdaşlıq və Azərbaycan–Avropa İttifaqı münasibətlərinin inkişafı məsələlərini də müzakirə ediblər.
Mənbə: prezident.az