Sizə nə var e, mən qəribə xəstəliyə tutulmuşam.
Arvadımdan savayı hansı qadına toxunuramsa, məni elektrik cərəyanı vurur.
Həkim, falçı qalmadı gedim, xeyri olmadı .
Dostum dedi bir həkim var Almaniyada oxuyub gəlib, gedək sənə baxsın. Həkim qadın idi. Əlimi ona toxunduran kimi məni elektrik enerjisi vurdu. Həkim mat qaldı.
Çox fikirləşəndən sonra dedi, gəl eksperiment edək, sənin qanından bir kişiyə köçürək görək nə alınır. Mənim qanımdan bir kişiyə köçürdü. Eksperiment müsbət alındı. Kişi öz arvadından savayı hansı qadına toxunurdusa, onu elektrik enerjisi vururdu.
Həkim jurnalistlərə eksperiment barədə müsahibə verəndən sonra səhəri xəstəxananın qabağında adam əlindən tərpənmək olmurdu. İynə atsaydın yerə düşməzdi. Arvadlar ərləri ilə gəlmişdilər. Arvadların üzündə təbəssüm, kişilərin üzündən zəhrimarlıq yağırdı.
Bu xəbər dünyaya yayıldı. Bir neçə ölkədə kişilər mənə ölüm şuarı ilə mitinq keçirtdilər. Qadınlar isə müdafiə fondu yaratdılar. Mənim qanımdan kişilərə vurulmasını tələb etdilər.
Müəllif: Yazıçı-dramaturq Əhməd Orucoğlu