Bugun.tv xəbər verir ki, ABŞ-ın Ohayo ştatının Kolumbus şəhərində yaşayan 46 yaşlı Zakari Bodiş ikinci əl mağazasından cəmi 14,14 dollara aldığı afişanın dəyərini sonradan öyrənərək təəccüblənib.
Bodiş iki il əvvəl muzeydəki işini itirdikdən sonra dolanışığını təmin etmək üçün ikinci əl əşyalar alıb-satmağa başlayıb. O, növbəti alışlarından biri zamanı Pablo Pikassonun sərgi afişasına bənzəyən bir əsərə rast gəlib.
Əvvəlcə adi bir surət olduğunu düşünərək aldığı əşyanın əslində daha qiymətli ola biləcəyi üzə çıxıb. Mütəxəssislər əsərin orijinal olduğu təsdiqlənərsə, onun 4-6 min dollar arasında alıcı tapa biləcəyini bildiriblər.
Xəbəri eşidən və risk etməyə hazır olan bir kolleksiyaçı Bodişlə telefon əlaqəsi saxlayıb. Nəticədə afişa 7 min dollara satılıb.
Əsərin əvvəlki sahibi isə onu 1960-cı illərdə bir dostunun hədiyyə etdiyini bildirib. O, afişanın dəyərini üzə çıxaran şəxsin bundan qazanc əldə etməsinə sevindiyini deyib.
Mənbə: EnSonHaber