Bugun.tv xəbər verir ki, ABŞ Prezidenti Donald Trump məcburi əməyin qarşısının alınması istiqamətində kifayət qədər addım atmayan ölkələrə qarşı yeni gömrük rüsumları tətbiq etməklə hədələyib.
Reuters agentliyinin məlumatına görə, Vaşinqton təxminən 60 ölkədən idxal olunan məhsullara əlavə 10–12,5 faiz tarif tətbiq etməyi nəzərdən keçirir. ABŞ administrasiyası hesab edir ki, həmin ölkələr məcburi əmək və müasir köləliklə mübarizədə yetərli səylər göstərmirlər.
Lakin ticarət və insan hüquqları üzrə ekspertlər bu təşəbbüsün effektivliyini şübhə altına alıblar. Onların fikrincə, tariflərin artırılması qlobal təchizat zəncirində uşaq əməyinin və məcburi əməyin aradan qaldırılmasına ciddi təsir göstərməyəcək.
İnsan Hüquqları Müşahidəçisi (Human Rights Watch) nümayəndələri də bildiriblər ki, belə addımlar bəzi ölkələrdə əks reaksiyaya səbəb ola və problemin həllini daha da çətinləşdirə bilər.
Beynəlxalq Əmək Təşkilatının məlumatına əsasən, hazırda dünyada təxminən 27,6 milyon insan məcburi əmək şəraitində çalışır. Bu göstərici 2016-cı illə müqayisədə 2,7 milyon nəfər çoxdur.
Mənbə: mail.ru