Rusiya Xarici İşlər Nazirliyi Böyük Britaniya səfirliyində çalışan bir diplomatın ölkədən çıxarılması barədə qərar qəbul edib.
Nazirliyin yaydığı açıqlamada bildirilib ki, sözügedən diplomatın İngiltərə kəşfiyyatı ilə əlaqəli olduğu və Rusiyada kəşfiyyat fəaliyyəti apardığı müəyyən edilib. Bu səbəbdən onun akkreditasiyası ləğv olunub və ölkəni tərk etməsi tələb edilib.
Məlumata görə, məsələ ilə bağlı Böyük Britaniyanın Moskvadakı səfirliyinin müvəqqəti işlər vəkili Danae Dholakia Rusiya Xarici İşlər Nazirliyinə çağırılıb. Ona rəsmi etiraz notası təqdim olunub. Rusiya tərəfi həmçinin diplomatın ölkəyə giriş zamanı yanlış məlumat verdiyini də qeyd edib.
Rusiya rəsmiləri bu şəxsin ölkədə “pozucu fəaliyyətlər” həyata keçirdiyini iddia edərək bunun yerli qanunvericiliyə zidd olduğunu vurğulayıb.
Açıqlamada əlavə olunub ki, Rusiya ərazisində xarici kəşfiyyat xidmətlərinin gizli fəaliyyətinə icazə verilməyəcək və milli təhlükəsizlik maraqları qorunacaq. Həmçinin London tərəfindən gərginliyi artıracaq addımlar atılacağı təqdirdə, Moskvanın cavab verəcəyi bildirilib.
Mənbə: İLKHA