Rusiya Birləşmiş Millətlər Təşkilatındakı (BMT) Daimi Nümayəndəsinin müavini Anna Evstigneeva İsrailin Suriya ərazisində “özbaşına hücumlar” təşkil etdiyini və bunun Dəməşq rəhbərliyinin sabitliyinə zərər verdiyini bildirib.
Bugun.tv xəbər verir ki, Evstigneeva BMT Təhlükəsizlik Şurasında “Yaxın Şərqdə vəziyyət” mövzusunda keçirilən aylıq iclasda çıxışı zamanı qeyd edib ki, Suriya rəhbərliyi təhlükəsizlik məsələlərində dialoqa açıq olsa da, İsrail Suriyanın ərazi bütövlüyünü sistemli şəkildə pozmağa yönəlmiş siyasət yürüdür.
Rus diplomat vurğulayıb ki, İsrail işğal etdiyi ərazilərdən qüvvələrini geri çəkməkdən imtina edir və Suriyada mütəmadi olaraq hücumlar təşkil edir. Onun sözlərinə görə, İsrail ordusu Suriyanın cənub bölgələrində basqınlar həyata keçirir, mülki şəxsləri qaçırır və özbaşına nəzarət məntəqələri yaradır.
Evstigneeva həmçinin bir neçə gün əvvəl İsrailin Kuneytra bölgəsindəki kənd təsərrüfatı sahələrinə “naməlum kimyəvi maddələr püskürtməsi” ilə bağlı yayılan məlumatlardan narahatlıq keçirdiklərini bildirib. O qeyd edib ki, nəticədə bəzi kəndlərdə bitki örtüyü tamamilə məhv edilib, buğda və arpa əkinləri zərər görüb.
Rusiya nümayəndəsi bu məsələnin humanitar təşkilatlar tərəfindən araşdırılacağına ümid etdiyini ifadə edib.
Evstigneeva Suriyada keçid prosesini və ölkənin şimal-şərq bölgəsinin mərkəzi hökumətlə birləşməsi ilə bağlı inkişafları müsbət qiymətləndirib. O bildirib ki, Rusiya daim vahid və dost Suriyanın tərəfdarıdır və Dəməşqin bu istiqamətdə atdığı addımları dəstəkləyir.
ABŞ-ın BMT-dəki Daimi Nümayəndəsinin müavini Tammy Bruce isə Suriyanın “suveren, vahid və qonşuları ilə sülh içində” bir ölkə olmasını istədiklərini deyib. Bruce, Suriya prezidentliyinin 2026-cı il 13 saylı fərmanını müsbət qiymətləndirərək, bu sənədin tam şəkildə həyata keçirilməsinə ümid etdiklərini vurğulayıb.
Mənbə: TRT Haber