Rusiya və Gürcüstan arasında diplomatik münasibətlərin olmadığı şəraitdə tərəflər birbaşa təmasları yenidən aktivləşdiriblər. Noyabrın 19-da Minskdə keçirilən görüşdə iki ölkə arasında iqtisadi, ticarət və humanitar əməkdaşlıq məsələləri müzakirə olunub.
Bugun.tv xəbər verir ki, bu barədə “Mail.ru” məlumat yayıb.
Görüşdə Rusiyanın xarici işlər nazirinin müavini Mixail Qaluzin və Gürcüstanın baş nazirinin Rusiya ilə əlaqələr üzrə xüsusi nümayəndəsi, xarici işlər nazirinin birinci müavini Giorgi Zurabişvili iştirak ediblər.
Tərəflər ticarət-iqtisadi və mədəni-humanitar münasibətləri, mövcud problemləri, eləcə də regional təhlükəsizlik məsələlərini müzakirə ediblər. Görüşün yekununda bir sıra praktiki razılaşmalar əldə olunduğu bildirilsə də, onların detalları açıqlanmayıb.
Diplomatik münasibətlərin bərpası demək deyil
Qeyd edək ki, Gürcüstan 2008-ci ildə baş verən Rusiya-Gürcüstan müharibəsindən sonra Moskva ilə diplomatik münasibətləri kəsib. Buna görə də Minsk görüşü iki ölkə arasında diplomatik münasibətlərin bərpası kimi qiymətləndirilməməlidir. Tərəflər dialoqu davam etdirmək barədə razılığa gəliblər.
Mənbə: Mail.ru
