Bugun.tv xəbər verir ki, Rusiya ordusunun Ukraynanın paytaxtı Kiyevə həyata keçirdiyi genişmiqyaslı raket hücumu nəticəsində ən azı 6 nəfər ölüb, 33 nəfər yaralanıb.
Associated Press-in məlumatına görə, avqustun 20-də gecə saatlarında Kiyevin bir neçə rayonuna raket zərbələri endirilib. Hücum nəticəsində şəhərin Darnitski, Svyatoşinski və Solomyanski rayonlarında çoxsaylı dağıntılar qeydə alınıb.
Solomyanski rayonunda doqquzmərtəbəli yaşayış binasının yuxarı iki mərtəbəsi dağılıb. Bir sıra yaşayış binalarında yanğın baş verib. Hücum nəticəsində tibb müəssisəsi və təhsil obyektlərinə də ziyan dəyib.
Fövqəladə hallar xidmətinin əməkdaşları dağıntılar altında insanların qalıb-qalmadığını müəyyənləşdirmək üçün axtarış-xilasetmə işlərini davam etdiriblər. Bəzi sakinlərin yaşayış binalarından və sığınacaqlardan təxliyə edildiyi bildirilib.
Hücum Kiyevin hava hücumundan müdafiə sistemləri ilə bağlı problemlərin yenidən gündəmə gəldiyi bir vaxtda baş verib. AP qeyd edir ki, Ukrayna xüsusilə ballistik raketlərin qarşısının alınması üçün istifadə olunan ABŞ istehsalı Patriot sistemlərinin raket çatışmazlığı ilə üzləşir.
Rusiya və Ukrayna arasında qarşılıqlı hava zərbələri son dövrlərdə daha da intensivləşib. Ukrayna da Rusiyanın hərbi və strateji obyektlərinə uzaqmənzilli dron hücumlarını artırıb.
Kiyevə son hücum nəticəsində ölən və yaralananların sayının axtarış-xilasetmə əməliyyatları başa çatdıqdan sonra dəyişə biləcəyi bildirilir.
Mənbə: Associated Press