Bugun.tv xəbər verir ki, Rusiya gecə saatlarında Ukraynanın bir sıra bölgələrinə raket və dronlarla zərbələr endirib. Ukrayna rəsmilərinin məlumatına görə, hücumlar nəticəsində azı 5 nəfər ölüb, bir neçə nəfər yaralanıb.
Associated Press yazır ki, zərbələr ən azı dörd Ukrayna bölgəsini əhatə edib. Dnepropetrovsk vilayətinin Dnipro, Pavlohrad və Krivoy Roq şəhərlərində sənaye müəssisələri və digər obyektlər vurulub. Dneprdə “Interpipe” şirkətinə məxsus istehsalat müəssisəsinə raket zərbəsi nəticəsində 4 nəfər ölüb, 7 nəfər yaralanıb. Sumı vilayətində isə dron hücumu nəticəsində bir qadının öldüyü bildirilib.
Ukrayna Hərbi Hava Qüvvələri hücum zamanı 212 dron, 4 qanadlı raket, həmçinin “Oniks” və ballistik raketlərin istifadə edildiyini açıqlayıb.
Çerniqov vilayətində enerji obyektinə zərbə nəticəsində təxminən 100 min istehlakçı elektrik enerjisiz qalıb. Rusiya Müdafiə Nazirliyi isə hücumlarda sənaye və hərbi obyektlərin, yanacaq-enerji sektorunun və liman infrastrukturunun hədəfə alındığını bildirib.
Hücumlar Ukrayna Prezidenti Volodimir Zelenskinin Nyu-Yorkda ABŞ Prezidenti Donald Trampla görüşməyə hazırlaşdığı vaxt baş verib.
Mənbə: AP News