Böyük Britaniyanın Azərbaycandakı səfiri Ferqus Old ölkəmizin İrandakı səfirliyində törədilmiş terror aktı nəticəsində həlak olan baş leytenant Orxan Əsgərovun yas mərasimində iştirak edib. Məlumata görə, diplomat Bakının Yasamal rayonunda qurulan xüsusi çadırda olub. O, dəfn mərasimində iştirak edərək şəhidin atasına başsağlığı verib.
Xatırladaq ki, yanvarın 27-də Bakı vaxtı ilə səhər saat 8:30 radələrində Azərbaycanın İrandakı səfirliyinə silahlı basqın edilib. Məlumata görə, Kalaşnikov avtomatı ilə silahlanmış terrorçu mühafizə postuna daxil olaraq təhlükəsizlik xidmətinin rəisi Orxan Əsgərovu qətlə yetirib. Hücumun qarşısı alınarkən diplomatik nümayəndəliyin iki mühafizəçisi yaralanıb. Cinayət törədən şəxs Azərbaycan səfirliyinin əməkdaşı tərəfindən saxlanılıb.
Mənbə: report