“Bugün TV” xəbər verir ki, Bakının tarixi məkanlarından biri olan Buxara Karvansarasında səhər yoqa praktikası təşkil olunacaq.
Tədbir yoqa təlimçisi İlhamə Şirinovanın rəhbərliyi ilə baş tutacaq.
İlhamə Şirinovanın sözlərinə görə, layihənin əsas məqsədi insanlara günə daha sakit, balanslı və ahəngli şəkildə başlamaq imkanı yaratmaqdır. O bildirib ki, səhərin ilk saatları insanın ruhu və zehni üçün ən təmiz zamanlardan hesab olunur.
“Təbiətin və səhərin enerjisini birlikdə hiss etmək, günəşin ilk işıqlarını qarşılamaq və İçərişəhərin xüsusi atmosferində daxili sakitliyi tapmaq istəyirik”, – deyə İlhamə Şirinova qeyd edib.
Praktika zamanı iştirakçılar yumşaq yoqa hərəkətləri, nəfəs çalışmaları və meditativ məşqlərlə məşğul olacaqlar. Tədbirin tarixi Buxara Karvansarasında keçirilməsi isə səhər proqramına xüsusi ab-hava qatacaq.
Qeyd edək ki, səhər yoqa praktikası mayın 25-də saat 07:00-da keçiriləcək və iştirak ödənişsiz olacaq.