Bugun.tv xəbər verir ki, Xaçmaz Rayon İdman kompleksində şəhid Azad Hümbətovun xatirəsinə həsr edilmiş sambo idman növü üzrə müxtəlif yaş qruplarından olan məktəblilər arasında yarış baş tutub.
Qeyd edək ki, yarış Quba-Xaçmaz Regional Gənclər və İdman idarəsinin rəisi Nəcəf Novruzovun təşkilatçılığı ilə keçirilib.
Tədbirdə Vətən Müharibəsi Qəhrəmanı, baş leytenant, şəhid Azad Hümbətovun atası, Nərimanov Rayon Ağsaqqallar Şurasının sədri Arif Hümbətov, şuranın idarə heyəti, şəhid ailələri və digər qonaqlar iştirak ediblər.
Yarışın sonunda sambo üzrə yer tutan müxtəlif yaş qruplarından olan qalib məktəblilər diplom və medallarla təltif olundu.
Qeyd edək ki, Vətən Müharibəsi Qəhrəmanı, baş leytenant, şəhid Azad Hümbətov Füzuli, Qubadlı, Laçın istiqamətlərində gedən döyüşlərdə iştirak edib. O 24 yanvar 1996 Bakı şəhərində anadan olmuşdur. Tank tağımı komandiri olan Azad Hümbətov öz həyatını təhlükəyə ataraq düşmənin 5 tankını öz mövqelərimizə gətirib çıxarmış və dəfələrlə öz döyüş yoldaşlarını düşmən mühasirəsindən yaralı halda çıxara bilmişdi.
Müharibənin yeni başladığı dövrdə o, komandirlik etdiyi tankı ilə minaya düşür. Özü ayağından yaralanır, tankı idarə edən mexanikinin daha ağır xəsarətlər aldığını gördükdə isə onu yaralı halda 25 km meşə ərazisində belində daşıyaraq 2 gündən sonra öz döyüş postlarına gətirib çıxara bilmişdi. Bundan sonra Azadı Beyləqanda hospitala müalicə üçün göndərirlər. O burada müalicəsini yarımçıq qoyaraq yenidən döyüş meydanına qayıdır.
Ailəsi isə onun yaralı vəziyyətdə olmasından, müalicəsini yarımçıq qoyub yenidən döyüş meydanına qayıtmasından yalnız şəhid olandan sonra xəbər tutur. Onu da qeyd edək ki, döyüşlər zamanı rəhbəri olduğu tank bölüyündən, ona ehtiyac olan piyada döyüş bölüyünə rəhbər təyin edilir.
27 oktyabr 2020-ci ildə Laçın uğrunda gedən döyüşlərdə şəhid olan Azad İkinci Fəxri Xiyabanda dəfn olunmuşdur.
Allah rəhmət eləsin.