Şərqi Aralıq dənizində Böyük Britaniyaya məxsus hərbi gəminin vurulması ilə bağlı yayılan xəbərlər rəsmi mənbələr tərəfindən təkzib olunub.
Böyük Britaniya Müdafiə Nazirliyi mənbələri bildiriblər ki, Hizbullah tərəfindən Şərqi Aralıq dənizi akvatoriyasında İngiltərəyə məxsus hərbi gəminin vurulması barədə məlumatlar həqiqəti əks etdirmir.
Qeyd olunub ki, Kral Donanması tərkibinə daxil olan HMS Dragon adlı hava hücumundan müdafiə esminesinin hücuma məruz qalması və zərər görməsi ilə bağlı iddialar əsassızdır.
İngilis mətbuatına danışan rəsmi mənbələr vurğulayıblar ki, sözügedən gəmi hazırda Cənubi Kipr Rum Administrasiyası ətrafındakı sularda patrul xidməti həyata keçirir və bölgədəki vəziyyətlə bağlı əməliyyat fəaliyyətlərini davam etdirir.
CƏNUBİ KİPRDƏKİ HAVA ÜSLƏRİNİ QORUYUR
Məlumata görə, İngiltərənin bölgədə yerləşən hərbi qüvvələri, o cümlədən sözügedən gəmi, İran tərəfindən istifadə edilən pilotsuz uçuş aparatları və digər silahlara qarşı müdafiə məqsədilə fəaliyyət göstərir.
Bildirilib ki, Kral Hərbi Hava Qüvvələri də bölgədə yerləşən hava bazalarını qorumaq üçün əməliyyatlarını davam etdirir və İran istehsalı pilotsuz aparatların zərərsizləşdirilməsində iştirak edir.
Eyni zamanda, Böyük Britaniyaya məxsus döyüş təyyarələrinin Şərqi Aralıq dənizi, İordaniya, Bəhreyn və Birləşmiş Ərəb Əmirlikləri üzərində müdafiə missiyalarını davam etdirdiyi qeyd olunub.
Mənbə: Ensonhaber