Səudiyyə Ərəbistanının hava hücumundan müdafiə qüvvələri paytaxt Ər-Riyad istiqamətində buraxılan iki raketi, həmçinin ölkənin cənubuna yönələn daha bir raketi zərərsizləşdirib. Hadisə bölgədə gərginliyin yenidən artdığı bir vaxtda baş verib.
Bugun.tv xəbər verir ki, bu barədə “Al Jazeera” nəşri noyabrın 10-da məlumat yayıb.
Məlumata görə, Səudiyyə Ərəbistanının rəhbərlik etdiyi koalisiyanın sözçüsü Türki əl-Maliki hücumların Yəməndə fəaliyyət göstərən husilər tərəfindən həyata keçirildiyini bildirib. Onun sözlərinə görə, Ər-Riyad üzərində bir ballistik və bir qanadlı raket, ölkənin cənubunda isə daha bir ballistik raket vurulub. Paytaxt sakinlərinə hava təhlükəsi ilə bağlı xəbərdarlıq mesajları göndərilib. Daha sonra mülki müdafiə xidməti təhlükənin sovuşduğunu açıqlayıb.
Bundan bir gün əvvəl Səudiyyə Ərəbistanının Mədinə bölgəsində yerləşən Şərq-Qərb neft boru kəmərinə də hücum edilmişdi. Ölkənin Energetika Nazirliyinin məlumatına əsasən, zərbə nəticəsində məhdud yanğın baş verib, lakin alov söndürülüb və neft nəqlində fasilə yaranmayıb. Hadisə zamanı xəsarət alan və ya ölən olmayıb.
Husilər raket hücumları ilə bağlı dərhal açıqlama verməyiblər. Bununla yanaşı, husilərə bağlı SABA agentliyi Səudiyyə Ərəbistanının rəhbərlik etdiyi koalisiyanın Yəmənin paytaxtı Sənaya hava zərbələri endirdiyini iddia edib. Koalisiya bu məlumatı hələlik təsdiqləməyib.
Mənbə: Al Jazeera