Stomatoloq-terapevt Anastasiya Çernoşey bildirib ki, hər bir soyuqdəymə, qrip və ya digər virus infeksiyasından sonra diş fırçasını mütləq dəyişmək lazımdır. Onun sözlərinə görə, bir çox insanlar xəstəlik zamanı müalicə qaydalarına — daha çox maye qəbuluna, dərman istifadəsinə və istirahətə — ciddi əməl etsələr də, xəstəlik dövründə istifadə etdikləri diş fırçasını dəyişmirlər. Bu isə həm yeni sağalmış şəxsin, həm də ailə üzvlərinin yenidən yoluxma riskini artırır.
Həkim izah edib ki, soyuqdəymə, qrip və digər virus infeksiyaları zamanı ağız boşluğunda çoxlu sayda patogen mikroorqanizmlər — viruslar, bakteriyalar və göbələklər toplanır. Dişlərin təmizlənməsi zamanı bu mikroorqanizmlər fırçanın tüklərinə keçir və fırça onların qalması və çoxalması üçün əlverişli mühitə çevrilir. Sağaldıqdan sonra eyni fırçadan istifadə etmək patogenlərlə yenidən təmas riskini yaradır və nəticədə təkrar yoluxma ehtimalı artır. Xüsusilə qrip və adenovirus infeksiyalarında bəzi viruslar diş fırçasının tükləri üzərində bir neçə gün aktiv qala bilir.
Çernoşey qeyd edib ki, diş fırçasını qaynar su, antiseptik və ya xüsusi məhlullarla təmizləməyin kifayət etdiyi fikri yanlışdır. Onun sözlərinə görə, məişət şəraitində tam dezinfeksiya mümkün deyil: yüksək temperatur fırçanın tüklərini deformasiyaya uğradır və istifadə müddətini azaldır, antiseptik vasitələr isə liflər arasındakı mikroskopik boşluqlara tam nüfuz etmir.
Riskləri minimuma endirmək üçün stomatoloq bir sıra sadə tövsiyələr verib. O, hər bir soyuqdəymə, angina, qrip və ya bağırsaq infeksiyasından sonra diş fırçasının dəyişdirilməsini məsləhət görüb. Eyni tövsiyə ailə üzvlərinə də aiddir, xüsusilə fırçalar birlikdə saxlanılıbsa. Bundan əlavə, diş fırçalarının bir-birinə toxunmaması üçün fərdi stəkan və ya saxlayıcılardan istifadə olunmalı, xəstəlik dövründə isə ağız boşluğunun gigiyenasına daha çox diqqət yetirilməlidir. Həkimin sözlərinə görə, yumşaq diş fırçası, ehtiyatlı təmizləmə texnikası və vaxtında ağız yaxalama diş ətlərinin iltihabını azaltmağa və selikli qişanın sağlamlığını qorumağa kömək edir.
Mənbə: mail.ru