Bugun.tv xəbər verir ki, tanınmış jurnalist, Azərbaycan televiziyasının aparıcısı Mümtaz Xəlilzadə Media Tədris Mərkəzində diksiya, düzgün nitq mövzusunda təlim keçib. O, çalışdığı illər ərzində qazandığı təcrübəsini tələbələrlə bölüşüb. Təlim 2 saat davam edib.
M.Xəlilzadə gələcəyin jurnalistlərinə aparıcılığın sirlərini də öyrədib. Səlis danışıq və tələffüzlə yanaşı, tələbələrə düzgün nəfəs alma, düzgün oturuş və duruş qaydalarından danışıb. Efir aparıcısının jest və mimikalarla necə işləməli olduğunu izah edib.
“Diktor, aparıcı ilk növbədə bədən dilini bilməlidir. Özünü kiməsə bənzətməmlidir. Əksinə, özünəməxsus jestikası olmalıdır. Bu gün tamaşaçını aldatmaq mümkün deyil. Ona görə də hansısa aparıcını təkrarlayan, onun jestlərindən istifadə edənlər qəbul olunmur. Diktor və ya aparıcı peşəsi düşünüldüyü və göründüyü kimi asan peşə deyil. Yaxşı aparıcı olmaq üçün öncə yaxşı jurnalist olmaq lazımdır. Bununla yanaşı, bu sahədə çalışmaq istəyən şəxs ilk növbədə özü olmalı, səmimi obraz yaratmağı bacarmalıdır. Bu zaman tamaşaçılar da sənə etibar edib, güvənəcəkdir”, – deyə, o, vurğulayıb.
Təlimdə Mümtaz Xəlilzadə MediaTədris Mərkəzinin tələbələrinin oxuduqları xəbər blokları əsasında onların diksiyalarını dinləyib. Tövsiyələr verib.
Tanınmış aparıcı daha sonra gələcəyin jurnalistlərinin suallarını cavablandırıb.