Bugun.tv xəbər verir ki, Tayland Cənubi Koreyanın “Hanwha Ocean” şirkətini yeni freqatın hazırlanması üçün keçirilən 508 milyon dollarlıq layihənin qalibi seçib.
Anadolu Agentliyinin məlumatına görə, Tayland Kral Hərbi Dəniz Qüvvələrinin layihəsinin ümumi dəyəri 16,73 milyard bat, yəni təxminən 508 milyon dollar təşkil edir. Müqaviləyə əsas gəmi ilə yanaşı müxtəlif sistemlər, avadanlıqlar, ehtiyat hissələri, təlim və texniki dəstək də daxildir.
Şirkətin seçilməsi Taylandın hərbi-dəniz imkanlarını gücləndirmək planının bir hissəsidir. Hanwha Ocean Cənubi Koreyanın iri gəmiqayırma və dəniz mühəndisliyi şirkətlərindən biridir.
Tayland Kral Donanmasının layihə komitəsinə rəhbərlik edən admiral Koravit Çayarati şirkətin digər namizədlər arasında ən yaxşı təklifi verdiyini açıqlayıb. Baş nazir Anutin Çarnvirakun da seçim nəticələrinin yekunlaşdırılmasını təsdiqləyib.
Rəsmi seçim nəticələrinin sentyabrın 18-də elan ediləcəyi bildirilib. Bu tarixə qədər digər iştirakçıların etiraz verməsi üçün müddət nəzərdə tutulub.
Layihə Cənub-Şərqi Asiyada müdafiə sənayesi üzrə Cənubi Koreya ilə əməkdaşlığın genişləndirilməsi baxımından da diqqət çəkir.
Mənbə: AnadoluAgentliyi