Bugun.tv xəbər verir ki, ABŞ Prezidenti Donald Tramp İranla bağlı hərbi əməliyyatların uğurla davam etdiyini və Vaşinqtonun tezliklə qələbə qazanacağını bildirib.
TASS-ın məlumatına görə, Tramp bu açıqlamanı Böyük Britaniyanın GB News telekanalına müsahibəsində səsləndirib. ABŞ lideri İranın nüvə silahına malik ola bilməyəcəyini bildirərək, bu səbəbdən Vaşinqtonun artıq qələbə qazandığını iddia edib.
Tramp ABŞ-ın İrana qarşı hərbi əməliyyatlara başlaması barədə qərarını da müdafiə edib. Onun sözlərinə görə, Vaşinqton müdaxilə etməsəydi, İranın iki və ya dörd həftə ərzində nüvə silahına sahib olmaq imkanının yarana biləcəyini düşünüb. Tramp hazırda bu müddətin 25 ilə qədər uzandığını bildirib.
ABŞ Prezidenti eyni zamanda ölkəsinin İran əleyhinə apardığı əməliyyatların uğurlu olduğunu və Birləşmiş Ştatların Hörmüz boğazına nəzarət etdiyini deyib. Bu strateji su yolu dünya enerji daşımaları üçün mühüm əhəmiyyət daşıyır.
ABŞ və İsrail İrana qarşı müharibəyə fevralın 28-də başlayıb. İyun ayında Vaşinqton və Tehran arasında döyüşlərin dayandırılmasını nəzərdə tutan anlaşma əldə olunsa da, iyulun 8-dən etibarən ABŞ İrana qarşı genişmiqyaslı zərbələri yenidən bərpa edib.
Hazırda regionda hərbi və diplomatik gərginlik davam edir.
Mənbə: TASS