ABŞ Prezidenti Donald Trump Hörmüz boğazının yenidən açılmasından sonra NATO tərəfindən onunla əlaqə saxlanıldığını açıqlayıb.
Tramp bildirib ki, NATO rəsmiləri ondan köməyə ehtiyac olub-olmadığını soruşublar. ABŞ lideri isə cavabında alyansa ehtiyac duymadıqlarını deyərək, “əgər gəmilərini neftlə doldurmaq istəmirlərsə, uzaq dursunlar” ifadəsini işlədib.
“İran boğazı bir daha bağlamayacaq”
ABŞ prezidenti qeyd edib ki, İran Hörmüz boğazını yenidən bağlamamaqla bağlı razılığa gəlib. Onun sözlərinə görə, bu addım boğazın artıq qlobal ticarətə qarşı “silah” kimi istifadə edilməyəcəyini göstərir.
Tramp həmçinin vurğulayıb ki, ABŞ və İran regionda naviqasiyanın təhlükəsizliyini təmin etmək üçün əməkdaşlıq edir və İranın dəniz minalarını təmizlədiyini bildirib.
Regionda atəşkəs və diplomatik addımlar
Qeyd edək ki, Livan və İsrail arasında əldə olunan 10 günlük atəşkəs razılaşmasından sonra İran Hörmüz boğazının açıldığını elan edib. Bu addım qlobal bazarlarda müsbət reaksiyaya səbəb olub.
NATO-ya sərt tənqid
NATO ilə bağlı fikirlərində Tramp sərt mövqe sərgiləyib. O, alyansı “tam bir kağız pələng” adlandıraraq, lazım olan vaxtlarda kifayət qədər effektiv olmadığını iddia edib.
Pakistan və Körfəz ölkələrinə təşəkkür
ABŞ prezidenti Pakistanın Baş naziri Şehbaz Şərif və ordu rəhbəri Asim Munir-ə İran-ABŞ danışıqlarında vasitəçilik etdiklərinə görə təşəkkür edib.
Bununla yanaşı, Tramp Səudiyyə Ərəbistanı, Birləşmiş Ərəb Əmirlikləri və Qətərin regionda göstərdiyi dəstəyi də yüksək qiymətləndirib.
Mənbə: EnSonHaber