Bugun.tv xəbər verir ki, Donald Trump ABŞ-ın süni intellekt sahəsində qlobal liderliyini qorumaq məqsədilə fərmanı imzalayıb.
Ağ Evin yaydığı məlumata görə, sənəd süni intellekt texnologiyalarının inkişafını sürətləndirmək, innovasiyalar qarşısındakı bürokratik maneələri azaltmaq və milli təhlükəsizliyi gücləndirmək məqsədi daşıyır.
Fərmanda qeyd olunur ki, hökumət özəl sektorla əməkdaşlıq edərək həm innovasiyaları, həm də kibertəhlükəsizliyi təşviq edəcək. Dövlət qurumlarına süni intellekt sistemlərinin müdafiəsini gücləndirmək üçün 30 gün vaxt verilib.
Sənədə əsasən, ABŞ hökuməti qabaqcıl süni intellekt modellərinin təhlükəsizlik imkanlarını qiymətləndirmək üçün yeni mexanizm hazırlayacaq. Bununla yanaşı, yeni Aİ modellərinin hazırlanması və istifadəsi üçün məcburi lisenziya və ya icazə tələbi tətbiq edilməyəcək.
Fərmana görə, tərtibatçılar istədikləri halda yeni modelləri bazara çıxarmazdan əvvəl onları federal hökumətin məxfi yoxlamasına təqdim edə biləcəklər. Həmçinin süni intellektdən kibercinayətlər və qanunsuz fəaliyyətlər üçün istifadə edənlərə qarşı federal sanksiyaların sərtləşdirilməsi nəzərdə tutulur.
Ekspertlər hesab edirlər ki, yeni qərar ABŞ-ın süni intellekt sahəsində rəqabət qabiliyyətini artırmaqla yanaşı, texnologiyanın təhlükəsiz istifadəsinə də nəzarəti gücləndirəcək.
Mənbə: EnSonHaber