ABŞ prezidenti Donald Trump-ın İrana qarşı mümkün hərbi strategiyası ilə bağlı yeni müzakirələr yaranıb. CNN-in təhlilinə görə, Tramp istəsə belə, İrana qarşı “TACO əməliyyatı” adlandırılan yanaşmanı həyata keçirmək o qədər də asan görünmür.
Trampın İranın enerji infrastrukturuna zərbələri müvəqqəti dayandırması fonunda əsas sual onun müharibədən çıxış strategiyasının olub-olmamasıdır. ABŞ lideri İranla “məhsuldar danışıqlar” aparıldığını və 15 bəndlik razılaşma üzərində işlənildiyini bildirsə də, Tehran bu iddiaları təkzib edib.
Analitiklər qeyd edir ki, müharibələr iqtisadi qərarlardan fərqli olaraq ani şəkildə dayandırıla və ya yenidən başlana bilməz. Xüsusilə Hörmüz boğazı kimi qlobal enerji marşrutlarının təhlükə altına düşməsi vəziyyəti daha da mürəkkəbləşdirir.
ABŞ-ın İrana qarşı sərt ritorikası, o cümlədən elektrik stansiyalarına zərbə hədələri regionda gərginliyi artırıb. Buna cavab olaraq İran da ABŞ-ın müttəfiqlərinin yerləşdiyi Körfəz ölkələrindəki infrastruktur obyektlərini hədəfə ala biləcəyini bildirib.
Bununla belə, son açıqlamalar tərəflərin eskalasiyanın yüksək qiymətini anlayaraq müəyyən qədər geri addım atmağa çalışdığını göstərir. Ekspertlər hesab edir ki, bu cür siqnallar münaqişənin yumşaldılması istiqamətində ilkin mərhələ ola bilər.
Digər tərəfdən, Tramp administrasiyasının ziddiyyətli açıqlamaları və aydın strategiyanın olmaması ABŞ-ın mövqeyinə dair suallar yaradır. Bəzi müşahidəçilər isə hesab edir ki, hücumların dayandırılması qərarı qlobal bazarlarda sabitliyi qorumaq məqsədi də daşıya bilər.
Mənbə: CNN