Bugun.tv xəbər verir ki, dünyada hər il 300–330 milyon insan dini və mənəvi məqsədlərlə Türkiyəyə səyahət edir və müqəddəs məkanları ziyarət edir.
Birləşmiş Millətlər Təşkilatının Ümumdünya Turizm Təşkilatının (UNWTO) məlumatına əsasən, İnanc Turizminə maraq son illər artıb və bu tendensiyanın yaxın dövrdə də davam edəcəyi proqnozlaşdırılır.
Tarix boyu müxtəlif sivilizasiyalara ev sahibliyi etmiş Türkiyə, xüsusilə xristian irsinə əsaslanan inanc marşrutları ilə seçilir. Papa XIV Leo-nun ilk beynəlxalq səfərini etdiyi İznik, erkən dövr qaya kilsələri ilə məşhur Kapadokya və Müqəddəs Nikolay kilsəsinin yerləşdiyi Antalya xristian dünyası üçün mühüm ziyarət istiqamətləri sırasında yer alır.
Milad dövründə isə Türkiyənin Egey bölgəsində, müasir İzmir, Manisa və Denizli ərazilərini əhatə edən Vəhyin Yeddi Kilsəsi marşrutu xüsusi maraq doğurur. Rəvayətə görə, İsa Məsih vəhy zamanı Müqəddəs Yəhyaya bu yeddi kilsəyə məktublar yazmağı tapşırıb və həmin məktublarda icmalara mənəvi yol göstəriciləri verilib.
Marşrut boyu qədim şəhərlərin və kilsələrin qalıqları bu günədək qorunub saxlanılıb. Ziyarətçilər burada yalnız dini irslə deyil, eyni zamanda Egey bölgəsinin zəngin mədəniyyəti, təbiəti və mətbəxi ilə də yaxından tanış olmaq imkanı əldə edirlər. Səyahətə UNESCO-nun Dünya İrsi Siyahısına daxil edilmiş Efes qədim şəhərindən başlamaq tövsiyə olunur. Efesdə Həzrəti Məryəmin Evi, Müqəddəs Yəhya Bazilikası və Yeddi Yatanlar Mağarası əsas ziyarət məkanları hesab olunur.
Marşrut İzmir ərazisində Smirna və Perqamonla davam edir. Qədim Perqamon mədəniyyət və elm mərkəzi kimi tanınıb, burada məşhur Asklepion şəfa kompleksi və “Qırmızı Bazilika” kimi tanınan Serapis Məbədi yerləşir. Ardınca Manisa ərazisində Tiatira, UNESCO siyahısına daxil edilmiş Sardis və Filadelfiya qədim şəhərləri ziyarət olunur.
Səyahətin son dayanacağı isə Denizli yaxınlığında yerləşən Laodikiyadır. Erkən Şərqi Roma dövründə mühüm dini mərkəz olmuş bu şəhərdə kilsə qalıqları, teatrlar, aqoralar və Anadolunun ən böyük stadionu qorunur. Ziyarətdən sonra UNESCO-nun Dünya İrsi Siyahısına daxil edilmiş Hierapolis və Pamukkale məkanlarına baş çəkmək də tövsiyə edilir.
Beləliklə, Vəhyin Yeddi Kilsəsi marşrutu Milad dövründə Türkiyədə mənəvi dəyərlərlə zəngin, tarixi və mədəni irsi birləşdirən xüsusi səyahət təcrübəsi təqdim edir.
