Bugun.tv xəbər verir ki, Böyük Britaniyanın Uels bölgəsində aşkar edilən Roma hərbi qalası qədim bir rəvayətin tarixi əsaslarının ola biləcəyini göstərir.
“The Guardian” nəşrinin məlumatına görə, Pembrokşir bölgəsində, Frenni Fawr təpəsinin yaxınlığında aşkarlanan qala IV əsrə aid Roma hərbi məskəni hesab olunur. Arxeoloq Mark Merroninin rəhbərlik etdiyi tədqiqat zamanı ərazidə Roma dövrünə məxsus sikkələr, kirəmit qalıqları, saxsı parçaları və dəmir alətlər tapılıb.
Tapıntılar hansı sirri aça bilər?
Aşkarlanan iki sikkənin IV əsrin sonlarına aid olduğu bildirilir. Bu tapıntılar Roma imperatoru Maqn Maksimin həmin ərazidə hərbi düşərgə salması barədə orta əsr rəvayətinin həqiqətə əsaslana biləcəyini göstərir.
Təxminən 180 metr uzunluğunda və 150 metr enində olan qala ərazisinin 500-ə yaxın əsgəri yerləşdirmək üçün nəzərdə tutulduğu ehtimal edilir. Arxeoloji araşdırmalar bölgədə Roma hərbi fəaliyyətinin əvvəl düşünüldüyündən daha geniş ola biləcəyini göstərir. Bununla belə, tapıntıların qədim rəvayətlə birbaşa əlaqəsi əlavə tədqiqatlarla dəqiqləşdirilməlidir.
Mənbə: The Guardian