Bugun.tv xəbər verir ki, Ukrayna rəsmiləri Rusiyanın 2022-ci ildən bəri yüzlərlə ukraynalı hərbi əsirini sistemli şəkildə edam etdiyini bildiriblər.
Ukrayna kəşfiyyatının nümayəndəsinin AFP agentliyinə verdiyi məlumata görə, indiyədək 340-dan çox hadisədə 900-dən artıq ukraynalı hərbçinin öldürüldüyü qeydə alınıb. Rəsmi şəxs hesab edir ki, bu rəqəm faktiki halların yalnız 25–40 faizini əhatə edə bilər.
BMT-nin son hesabatında isə 129 ukraynalı hərbi əsirin edamı təsdiqlənib. Təşkilat ötən illə müqayisədə bu cür halların əhəmiyyətli dərəcədə artdığını vurğulayıb.
Ukrayna Baş Prokurorluğunun nümayəndəsi Andriy Atamançuk bildirib ki, indiyədək 306 hərbi əsirin öldürülməsi ilə bağlı 116 cinayət işi açılıb. Onun sözlərinə görə, bu hallar təsadüfi deyil və Rusiya ordusunda formalaşdırılmış siyasətin nəticəsidir.
Moskva ittihamları qəbul etmir. Rusiya tərəfi daha əvvəl də hərbi əsirlərin edamı ilə bağlı irəli sürülən iddiaları rədd edib.
Bununla yanaşı, Ukrayna ordusu Rusiyanın hərbi və enerji infrastrukturuna zərbələri davam etdirir. Məlumata görə, son günlər Azov dənizində Rusiya gəmiçiliyinə zərbələr endirilib, bir neçə neft emalı zavodu hədəfə alınıb və Krımda elektrik enerjisinin verilməsində məhdudiyyətlər tətbiq olunub.
Mənbə: The Guardian