Venesuelada prezident seçkilərinin nəticələrinə etiraz edən etirazçılarla təhlükəsizlik qüvvələri arasında baş verən insidentlərdə həyatını itirənlərin sayı 11-ə çatıb.
Venesuela Milli Seçki Şurasının (CNE) prezidenti Elvis Amoroso hazırkı prezident Nikolas Maduronun prezident seçkilərində qalib gəldiyini elan etdikdən sonra ölkədə xaos yaranıb. Paytaxt Karakasda toplaşan müxalifət tərəfdarları seçkinin nəticələrinə etiraz ediblər. Nümayiş zamanı etirazçılar müxtəlif əşyaları yandırıblar və polislə qarşıdurma yaranıb.
HƏYAT İTKİSİ 11DİR
Milli mətbuatda yer alan xəbərə görə, paytaxt Karakas başda olmaqla bir çox ştatda nümayişçilərlə polis arasında baş verən qarşıdurmalar nəticəsində insan itkiləri artıb. Hadisələr zamanı son 2 gündə 11 nəfər həyatını itirib, saxlanılanların sayı isə 749-a yüksəlib.
Etirazlarda ölənlərdən 5-nin Karakasda, 2-nin Zuliada, 2-nin Yaracuyda, Araqua və Taçirada isə hər birində bir nəfərin olduğu bildirilib.
Etirazların artması və ictimai əmlaka ziyan dəydiyi üçün minlərlə əsgər və polis Karakasın meydanlarına, küçələrinə və magistral yollarına göndərilib.
Səlahiyyətlilər tərəfindən verilən açıqlamada, ölkə daxilində təhlükəsizlik qüvvələrinin gördüyü “qətiyyətli” tədbirlər sayəsində şiddətin böyük ölçüdə nəzarət altına alındığı ifadə edilib.
Venesuela Seçki Şurasının açıqladığı nəticələrə görə, Nikolas Maduro 51,20 faiz səslə üçüncü dəfə prezident seçkilərində qalib gəlib.
İyulun 29-da seçkilər başa çatdıqdan sonra bəyanatla çıxış edən müxalifət Milli Seçki Şurasının məlumatlarının dəqiq olmadığını və nəticələrin saxta olduğunu iddia edib.
Seçkilərin nəticələrinin saxta olduğunu iddia edən onlarla insan meydanlara çıxaraq polislə toqquşur.
Mənbə: TGRT