Bugun.tv xəbər verir ki, Azərbaycan ilə Böyük Britaniya arasında imzalanmış Strateji Tərəfdaşlıq haqqında Birgə Bəyannamə iki ölkə arasındakı münasibətlərin yeni mərhələyə qədəm qoymasına, iqtisadi əlaqələrin genişlənməsinə və investisiya imkanlarının artmasına zəmin yarada bilər.
Bu barədə deputat Vüqar Bayramov öz sosial media hesabında paylaşdığı şərhdə bildirib.
Deputatın sözlərinə görə, Prezident İlham Əliyev və Böyük Britaniyanın Baş naziri Endi Börnhem tərəfindən noyabrın 12-də Dublində qəbul edilmiş Birgə Bəyannamə tərəfdaşlığın üç əsas istiqamətini müəyyənləşdirir. Bunlar müdafiə və təhlükəsizlik, ticarət, investisiya və iqtisadi artım, eləcə də təhsil və innovasiyadır.
Vüqar Bayramov qeyd edib ki, Azərbaycan ilə Böyük Britaniya arasında iqtisadi əlaqələr də sürətlə genişlənir. Böyük Britaniyanın Azərbaycana yatırdığı investisiyaların həcmi 39 milyard dolları ötüb və bu ölkə Azərbaycanın ən böyük xarici investorlarından birinə çevrilib.
Deputatın diqqət çəkdiyi digər məqam ticarət dövriyyəsinin artmasıdır. 2026-cı ilin ilk yarısında iki ölkə arasında ticarət dövriyyəsi 3,6 milyard dollara çatıb, Azərbaycanın Böyük Britaniyaya ixracı isə ötən ilin müvafiq dövrü ilə müqayisədə 24 dəfə artıb.
Onun fikrincə, əməkdaşlığın enerji sektorundan kənara çıxaraq süni intellekt, rəqəmsal texnologiyalar, təhsil və innovasiyanı əhatə etməsi Azərbaycan üçün yeni iqtisadi perspektivlər yaradacaq.
Qeyd edək ki, Birgə Bəyannamədə Orta Dəhlizin inkişafı, bərpaolunan enerji, infrastruktur, elmi tədqiqatlar və rəqəmsal bacarıqlar üzrə əməkdaşlığın genişləndirilməsi də nəzərdə tutulur.