Bugun.tv xəbər verir ki, Yəmənin Qırmızı dəniz sahili boyunca hökumət qüvvələri ilə Husilər arasında döyüşlər şiddətlənib. Hava zərbələri və quru döyüşləri nəticəsində çox sayda insanın həlak olduğu və yaralandığı, on minlərlə mülki şəxsin isə evlərini tərk etdiyi bildirilir.
Anadolu Agency-nin məlumatına görə, Beynəlxalq Miqrasiya Təşkilatı sentyabrın əvvəlindən etibarən Taiz, Hudeydə və Lahic vilayətlərindən 82 mindən çox insanın məcburi köçkün vəziyyətinə düşdüyünü açıqlayıb. Onlardan 2 mindən çoxunun dəniz yolu ilə Cibutiyə çatdığı bildirilib.
Yəmən ordusu Taiz vilayətinin Moxa və Dübab bölgələrində Husilərin mövqelərinə və hərbi texnikasına hava zərbələri endirildiyini açıqlayıb. Husilər isə son 24 saat ərzində ölkənin bir neçə vilayətinə ümumilikdə 58 hava zərbəsi endirildiyini bildiriblər.
Qarşıdurmalar nəticəsində ölən və yaralananların sayı ilə bağlı tərəflərin açıqlamaları arasında fərqlər var. Hökuməti dəstəkləyən Milli Müqavimət Qüvvələri avqustun 9-dan sentyabrın 10-dək qərb sahilində gedən döyüşlərdə 500 hərbçisinin öldüyünü, təxminən 1 500 nəfərin yaralandığını açıqlayıb. Eyni qurum 1 000-dən çox Husinin öldürüldüyünü iddia edib. Bu rəqəmlər müstəqil şəkildə təsdiqlənməyib.
Humanitar vəziyyətin ağırlaşması fonunda Ədən şəhərində yeni köçkün düşərgəsinin yaradılmasına başlanılıb. Düşərgənin 3-5 min nəfəri qəbul edə biləcəyi və döyüşlərdən qaçan ailələrə sığınacaq və ilkin tibbi yardım göstərəcəyi bildirilir.
Mənbə: AnadoluAgentliyi