Bugun.tv xəbər verir ki, Yaponiyada hökumət qurumlarının istifadə etdiyi informasiya sisteminə icazəsiz müdaxilə nəticəsində təxminən 246 min şəxsi məlumat qeydinin sızmış ola biləcəyi açıqlanıb.
Anadolu Agentliyinin məlumatına görə, hadisə Yaponiyanın dövlət qurumları tərəfindən istifadə olunan Government Solution Service (GSS) adlı ortaq informasiya mühitində baş verib. Ölkənin Rəqəmsal Agentliyi sistemə icazəsiz girişin iyunun 25-də aşkarlandığını bildirib.
Məlumata əsasən, hücum texniki xidmət və əməliyyatlara cavabdeh əməkdaşa məxsus hesab üzərindən həyata keçirilib. Sonrakı araşdırma zamanı xarici şəxsin VPN cihazındakı təhlükəsizlik boşluğundan istifadə etməklə sistemə daxil olduğu müəyyənləşdirilib. Hadisə ilə bağlı araşdırma iyulun 9-da tamamlanıb və həmin hesab deaktiv edilərək müvafiq avadanlıqların xarici şəbəkələrlə əlaqəsi məhdudlaşdırılıb. (aa.com.tr)
Potensial olaraq təsirlənən məlumatların təxminən 189 mininin dövlət qulluqçuları və GSS-dən istifadə edən təşkilatların əməkdaşları, 57 mininin isə dövlətlə işləyən şirkətlər və şəxslərlə bağlı olduğu bildirilir.
Yaponiyanın Rəqəmsal Agentliyinin məlumatına görə, sızmış ola biləcək məlumatlar arasında təxminən 236 min ad, 231 min elektron poçt ünvanı, 94 min telefon nömrəsi və 1 minə yaxın ünvan yer alır.
Qurum xüsusi olaraq vurğulayıb ki, hadisə Yaponiya hökumətinin ölkə əhalisi ilə bağlı saxladığı ümumi şəxsi məlumat bazasına aid deyil. Potensial olaraq məlumatları ələ keçirilmiş şəxslər və təşkilatlarla əlaqə saxlanılacağı bildirilib.
Hazırda araşdırma davam edir. Yaponiya hakimiyyəti həm məlumat sızmasının tam miqyasını müəyyənləşdirməyə, həm də oxşar hadisələrin təkrarlanmaması üçün əlavə təhlükəsizlik tədbirlərinin görülməsinə çalışır.
Mənbə: AnadoluAgentliyi