Osaka şəhərində su infrastrukturunun yenilənməsi üçün bələdiyyəyə 21 kiloqram qızıl bağışlanıb.
Mainichi Shimbun qəzetinin məlumatına görə, Osaka meri Yokoyama Hideyuki bildirib ki, adının açıqlanmasını istəməyən bir şəxs 2025-ci ilin noyabr ayında Su İşləri İdarəsinə 566 milyon yen (təxminən 3,6 milyon dollar) dəyərində qızıl təqdim edib.
Merin sözlərinə görə, ianəçi “Su təchizatı layihəsinə kömək etmək istəyirəm” deyə bildirib. Yokoyama bu məbləğin olduqca təəccüblü olduğunu vurğulayaraq, vəsaitin su infrastrukturu layihəsində diqqətlə istifadə olunacağını qeyd edib.
Məlumata əsasən, həmin şəxs 2025-ci ilin oktyabr ayında da 500 min yen (təxminən 3 300 dollar) məbləğində nağd ianə edib.
Bələdiyyə rəhbərliyi bağışlanan qızılı sataraq əldə ediləcək gəliri şəhərdə köhnəlmiş su borularının dəyişdirilməsi layihəsinə yönəltməyi planlaşdırır.
Qeyd edək ki, təxminən 2,8 milyon əhalisi olan Osaka Yaponiyanın əsas ticarət mərkəzlərindən biri hesab olunur. Yerli mediada daha əvvəl şəhərin su sisteminin yenilənməsi layihəsinin xərclərin planlaşdırılandan artıq olması səbəbilə ləngidiyi bildirilmişdi.
Mənbə: TRT Haber