Bugun.tv-nin xəbər verdiyi kimi, Prezident Bayden növbəti həftə namizədliyini irəli sürəcək. Ancaq bu, amerikalılar tərəfindən heç də birmənalı qarşılanmayıb.
“Baydenin prezidentliyə namizədliyi ABŞ da çox ciddi müzakirələrə səbəb olub. Bütövlükdə demokratların hakimiyyəti dövrü ABŞ-ın daxilində xarici siyasəti ilə bağlı narazılıqlar daha da güclənib. Çünki Trampın dövründə Amerika xarici, yəni ənənəvi imperialist siyasətdə daha fərqli mövqe tutaraq, başqa ölkələrin siyasi qərarlarına, daxili işlərinə daha hörmətlə yanaşırdı. Baydenin dövründə isə bu hörmətli yanaşma prosesi arxa plana keçirdi və demokratlar bütövlükdə klassik imperializmi davam etdirdilər”.
Bunu politoloq Tural İsamayılov Bugun.tv-yə açıqlamasında bildirib. Onun sözlərinə görə, Bayden öz prezidentliyini növbəti dəfə əldə etmək üçün Trampa qarşı qondarma hüquqi mübarizəyə başlayıb. Amerikada Tramp əleyhinə məhkəmə qərarlarının çıxarılması, eyni zamanda eks-prezidentin sıxışdırılması prosesi baş verir. “Bu isə ABŞ-ın əslində üzdə demokratiya hamisi kimi görünsə də, növbəti prezident seçkiləri öncəsində ölkədə vəziyyəti daha da sərtləşdirdiyini göstərən əsas amillərdəndir. Mən hesab edirəm ki, ABŞ da növbəti prezident seçkiləri kifayət qədər gərgin keçəcək. Trumpla Bayden tərəfdarları arasında ciddi toqquşmalar olacaq”,- politoloq əlavə edib.
Müxbir: Qaytən Qasımzadə