Bugun.tv xəbər verir ki, Böyük Britaniyada təxminən bir əsrdir qeydə alınmayan nadir böcək növü ilk dəfə canlı halda fotoşəkilə çəkilib.
Məlumata görə, xalq arasında “leş təlxək böcəyi” kimi tanınan Saprinus semistriatus növü sonuncu dəfə 1934-cü ildə rəsmi şəkildə qeydə alınmışdı. Şimali İrlandiyanın Benone Strand sahilində həvəskar təbiət müşahidəçisi Mel MakKuiti tərəfindən aşkar edilən böcəyin görüntüləri mütəxəssislər tərəfindən yoxlanıldıqdan sonra növün həqiqiliyi təsdiqlənib.
MakKuiti sahildə apardığı müşahidələr zamanı ölü kirpinin altında cəmi 3-4 millimetr uzunluğunda olan böcəyi görərək fotoşəkilini çəkib. Sonradan görüntülər ekspertlərə təqdim olunub və bunun təxminən 100 ildir etibarlı qeydi olmayan nadir növ olduğu müəyyənləşdirilib.
Mütəxəssislər bildirirlər ki, böcəyin kiçik ölçüləri və əsasən heyvan cəsədlərinin ətrafında yaşaması onun uzun illər diqqətdən kənarda qalmasına səbəb olub. Alimlər növün yenidən ortaya çıxmasını iqlim dəyişiklikləri və yaşayış arealının genişlənməsi ilə əlaqələndirirlər.
Kəşf Şimali İrlandiyada bioloji müxtəlifliyin qorunması baxımından mühüm hadisə kimi qiymətləndirilir.
Mənbə: Ensonhaber