Bugun.tv xəbər verir ki, Keniyanın cənubunda yerləşən Amboseli Milli Parkının ətrafında son bir ay ərzində ölən 15 filin ölüm səbəbinin sianid zəhərlənməsi ola biləcəyi açıqlanıb.
Keniya Vəhşi Təbiət Xidmətinin (KWS) baş direktoru Erustus Kanqanın sözlərinə görə, fil cəsədlərindən götürülən nümunələrin laborator analizləri zamanı sianid izləri aşkarlanıb. Mütəxəssislər hesab edirlər ki, heyvanlar pomidor plantasiyalarında istifadə olunan pestisidlərlə təmas nəticəsində zəhərləniblər.
Araşdırma zamanı bəzi fillərin mədəsində çoxlu miqdarda pomidor qalıqları aşkar edilib. Baytar həkimlərin fikrincə, bu fakt aqrokimyəvi maddələrlə zəhərlənmə ehtimalını daha da gücləndirir.
KWS rəsmiləri bildiriblər ki, hadisə təkcə vəhşi təbiət üçün deyil, bölgədə otlayan mal-qara və digər heyvanlar üçün də risk yarada bilər. Buna görə ərazidə genişmiqyaslı araşdırmalar davam etdirilir.
Təbiəti mühafizə təşkilatları hadisəni ciddi narahatlıq doğuran hal kimi qiymətləndirərək vəhşi heyvanların qorunması, pestisidlərin istifadəsinə nəzarətin gücləndirilməsi və elmi monitorinqin artırılmasının vacibliyini vurğulayıblar.
Qeyd edək ki, Amboseli Milli Parkı Afrikanın ən böyük fil populyasiyalarından birinə ev sahibliyi edir və bölgə ölkənin əsas ekoturizm məkanlarından biri hesab olunur.
Mənbə: The Guardian