Bugun.tv xəbər verir ki, bu gün Azərbaycanda Milli Dirçəliş Günü qeyd olunur. Xalqımızın milli özünüdərk, azadlıq və müstəqillik mübarizəsinin mühüm mərhələsini təcəssüm etdirən bu əlamətdar tarix Azərbaycanın müasir dövlətçilik tarixində xüsusi yer tutur.
Milli Dirçəliş Gününün əsası 1988-ci il noyabrın 17-də Bakıda başlayan kütləvi xalq hərəkatı ilə bağlıdır. Həmin gün minlərlə insan Ermənistanın Azərbaycana qarşı ərazi iddialarına, Qarabağ ətrafında baş verən hadisələrə və keçmiş Sovet rəhbərliyinin məsələyə münasibətinə etiraz etmək üçün paytaxtın o zamankı Lenin, indiki Azadlıq meydanına toplaşdı.
Etiraz aksiyaları qısa müddətdə geniş xalq hərəkatına çevrildi. Meydana toplaşan insanlar Azərbaycanın ərazi bütövlüyünün qorunmasını, milli hüquqların müdafiəsini və xalqın iradəsinə hörmət edilməsini tələb edirdilər. Noyabrın 17-də başlanan mitinqlər dekabrın 4-dək davam etdi. Sovet qoşunlarının müdaxiləsi ilə hərəkatın qarşısı alınsa da, bu hadisələr xalqın yaddaşında azadlıq mübarizəsinin rəmzi kimi qaldı.
Meydan hərəkatı Azərbaycan cəmiyyətində milli birlik və müstəqillik ideyalarının daha geniş yayılmasına, milli azadlıq düşüncəsinin güclənməsinə mühüm təsir göstərdi. Bu hadisələr ölkəmizin dövlət müstəqilliyinin bərpasına aparan tarixi proseslərin əsas mərhələlərindən biri hesab olunur.
1992-ci il oktyabrın 27-də qəbul edilən qanunla noyabrın 17-si Milli Dirçəliş Günü elan edildi.
Bu gün Milli Dirçəliş Günü yalnız tarixi hadisələrin xatırlanması deyil, həm də xalqımızın birlik, milli iradə və müstəqil dövlətçilik dəyərlərinə bağlılığının ifadəsidir. 1988-ci ildə Azadlıq meydanında başlanan hərəkat Azərbaycanın müstəqillik tarixində silinməz iz qoyub.
17 Noyabr – Milli Dirçəliş Günü münasibətilə xalqımızı təbrik edir, müstəqil Azərbaycanın daha da güclənməsini arzulayırıq!

