Bugun.tv xəbər verir ki, stilistlər 50 yaşdan yuxarı qadınların qarderobunda yer almalı olan beş əsas geyim və aksesuarı açıqlayıblar. Mütəxəssislərin fikrincə, düzgün seçilmiş və keyfiyyətli geyimlər həm gündəlik, həm də işgüzar görünüşü daha zövqlü və eleqant edə bilər.
“Lady Mail” nəşrinin “Parade” jurnalına istinadən yaydığı məlumata görə, stilistlər Culi Matos və Mikki Frimen qadınlara uzun müddət istifadə edə biləcəkləri, dəbdən tez düşməyən geyimlərə üstünlük verməyi məsləhət görürlər.
1. Keyfiyyətli pencək
Stilistlərin siyahısında ilk yerdə klassik pencək dayanır. Culi Matosun sözlərinə görə, düzgün seçilmiş pencək bədən quruluşunu daha yaxşı göstərir və sadə geyim dəstini belə daha səliqəli görünüşə çevirə bilir. Məsələn, cins şalvar və ağ köynəklə uyğunlaşdırılan pencək həm gündəlik, həm də işgüzar üslub üçün münasib seçimdir.
Pencək alarkən çiyinlərə düzgün oturmasına, parçanın keyfiyyətinə və qol uzunluğuna diqqət yetirmək tövsiyə olunur. Qara, tünd göy, bej və şokolad rəngləri müxtəlif geyimlərlə asanlıqla uyğunlaşır.
2. Klassik trençkot
Qarderobun digər vacib elementi klassik trençkotdur. Stilist Mikki Frimen bir neçə mövsüm istifadə oluna bilən, qalın pambıq parçadan hazırlanmış modelləri seçməyi məsləhət görür. Bu üst geyimi yaz və payız aylarında həm rahatlıq, həm də zövqlü görünüş təmin edə bilər.
3. Bədənə uyğun şalvar
Mütəxəssislərin tövsiyə etdiyi digər geyim yaxşı oturan klassik şalvardır. Belə şalvar pencək, köynək və müxtəlif üst geyimləri ilə uyğunlaşdırıla bilər. Əsas məsələ modelin rahat olması və bədən quruluşuna uyğun seçilməsidir.
4. Keyfiyyətli çanta
Stilistlər qarderobda keyfiyyətli çantanın da əhəmiyyətini vurğulayırlar. Mikki Frimen “Chanel”, “Hermès”, “Schiaparelli”, eləcə də “Alexander McQueen” və “Dior” brendlərinin bəzi kolleksiyalarından olan çantaları nümunə göstərib. Onun fikrincə, bu cür aksesuarlar yalnız gündəlik istifadə əşyası deyil, həm də sənət əsəri kimi dəyərini qoruya bilər.
5. Rahat və zərif ayaqqabı
Siyahını rahat və eleqant ayaqqabılar tamamlayır. 50 yaşdan yuxarı qadınlara loaferlərə, baletkalara və alçaqdaban ayaqqabılara nəzər salmaq tövsiyə olunur. Seçim zamanı yalnız görünüş deyil, ayaqqabının rahatlığı və gündəlik istifadəyə uyğunluğu da nəzərə alınmalıdır.
Stilistlərin əsas məsləhəti bahalı geyimlər almaqdan daha çox, bir-biri ilə uyğunlaşan, keyfiyyətli və uzun müddət istifadə edilə bilən əşyalara üstünlük verməkdir. Bu yanaşma qarderobu daha funksional etməyə və müxtəlif vəziyyətlər üçün rahat geyim dəstləri yaratmağa kömək edə bilər.
Mənbə: Lady Mail