Bugun.Tv xəbər verir ki, İran Prezidenti Məsud Pezeşkian nüvə məsələsi ilə bağlı Amerika Birləşmiş Ştatları ilə danışıqların bərpa olunması barədə göstəriş verib. Yerli media Tahran və Vaşinqton arasında diplomatik prosesin yaxın günlərdə sürətlənəcəyini bildirir.
Tehranda yerləşən SNN xəbər agentliyinin məlumatına görə, Pezeşkian ABŞ-la nüvə mövzusunda müzakirələrin yenidən başlanması barədə rəsmi tapşırıq verib. Tasnim agentliyinə danışan mənbələr isə danışıqların İranın xarici işlər naziri Abbas Arakçi ilə ABŞ-ın xüsusi nümayəndəsi Stiv Uitkoff səviyyəsində aparılacağını qeyd edib.
İran Xarici İşlər Nazirliyinin sözçüsü İsmayıl Bəqayi bildirib ki, mümkün danışıqların strukturu sanksiyaların ləğvi və milli maraqların təmin olunması prizmasından diqqətlə qiymətləndirilir. Onun sözlərinə görə, Tahran diplomatik prosesdə ehtiyatlı və vaxt amilini nəzərə alan mövqe sərgiləyir.
Axios-un yaydığı məlumata əsasən, Donald Tramp administrasiyası yaxın vaxtlarda danışıqlara başlamağa açıqdır. Bu addım 2025-ci ilin iyununda İsrailin İranın nüvə obyektlərinə endirdiyi zərbələrdən sonra tərəflər arasında ilk ciddi diplomatik təşəbbüs kimi qiymətləndirilir.
Xatırladaq ki, İran və ABŞ 2025-ci ildə baş verən qarşıdurmalardan əvvəl Oman vasitəsilə beş raund dolayı danışıqlar aparmışdı. Maskatda keçirilməsi planlaşdırılan altıncı görüş isə bölgədəki gərginlik səbəbindən ləğv olunmuşdu.
Mənbə: TrtHaber