NATO-nun Baş katibi Mark Rutte bildirib ki, Alyans daxilində ciddi “zihniyyət dəyişikliyi” müşahidə olunur və ABŞ nüvə və konvensional hərbi varlığını qoruduğu halda, Avropanın daha çox rol üstlənməsi NATO-nu daha güclü edir.
Bugun.tv xəbər verir ki, Rutte bu açıqlamanı NATO Müdafiə Nazirləri Toplantısından sonra mətbuata verdiyi bəyanatda səsləndirib.
O qeyd edib ki, bugünkü müzakirələr əvvəlkilərdən fərqli olub və müttəfiqlər 2025-ci ildə Haaqada keçirilən NATO Zirvəsində verdikləri öhdəlikləri yerinə yetirməyə başlayıblar. Baş katib bildirib ki, bunun artıq konkret nəticələri görünür.
“Müttəfiqlər birlikdədir”
Rutte Rusiyanın bombardmanları altında olan Ukraynanın təkcə müqavimət göstərmədiyini, eyni zamanda yüksək innovativ bacarıq nümayiş etdirdiyini vurğulayıb. O bildirib ki, NATO Ukraynaya hava hücumundan müdafiə, pilotsuz uçuş aparatları və əks-İHA texnologiyaları sahəsində dəstəyini davam etdirir.
Baş katib NATO-Ukrayna Şurasında Kiyevə yeni yardım öhdəliklərinin verildiyini də açıqlayıb və bunların həyati əhəmiyyət daşıdığını qeyd edib.
Rutte deyib:
“Ukraynaya dəstək məsələsində də, müttəfiq torpaqların hər qarışını müdafiə etmək məsələsində də birlikdəyik.”
“Avropa daha çox liderlik etməlidir”
ABŞ nümayəndə heyətinə müdafiə naziri Pete Hegseth əvəzinə Elbridge Colby-nin rəhbərlik etməsinə münasibət bildirən Rutte bunun NATO-ya bağlılığın azalması anlamına gəlmədiyini qeyd edib.
Onun sözlərinə görə, NATO daha çox Avropa liderliyi ilə güclənməlidir və bu, Avropa ölkələrinin müdafiə xərclərini artırması və daha çox məsuliyyət götürməsi deməkdir.
Ukraynaya silah axını davam edəcək
Rutte Ukraynaya ABŞ avadanlıqlarının axınının davam edəcəyinə əmin olduğunu bildirib. O qeyd edib ki, bu yardım Ukraynanın hava hücumundan müdafiə ehtiyaclarının təxminən 90 faizini, Patriot sistemləri üzrə isə 70 faizini təmin edir.
Baş katib eyni zamanda ABŞ-ın rəhbərliyi ilə aparılan sülh danışıqlarında təhlükəsizlik zəmanətlərinin 90-95 faizinin razılaşdırıldığını da açıqlayıb.
NATO daxilində fikir ayrılıqları
Rutte Qrenlandiya ilə bağlı NATO daxilində yaşanan müzakirələrə də toxunaraq bildirib ki, Alyans uzlaşma yolu ilə hər zaman çıxış yolu tapa bilir və hazırkı dəyişikliklər NATO-nu daha güclü edəcək.
Mənbə: TRT Haber