TRT Haber-in yaydığı məlumata görə, İran İsrailə qarşı yeni raket hücumu dalğasına başladığını elan edib. Bu barədə İran dövlət televiziyası rəsmi açıqlama yayıb.
Məlumata əsasən, hücum çərçivəsində İsrail istiqamətində bir neçə raket buraxılıb. Yerli media eyni zamanda Livanda fəaliyyət göstərən Hizbullah təşkilatının da paralel şəkildə İsrailə qarşı pilotsuz uçuş aparatları (PUA) ilə hücum həyata keçirdiyini bildirib. Hücumların koordinasiyalı şəkildə təşkil olunduğu iddia edilir.
Digər tərəfdən, İsrailin paytaxtı Tel Aviv başda olmaqla geniş ərazilərdə mobil telefonlara İran tərəfindən mümkün ballistik raket hücumu ilə bağlı xəbərdarlıq siqnalları göndərilib. Rəsmi qurumlar həmin bölgələrdə yaşayan əhaliyə dərhal sığınacaqlara getmək çağırışı edib.
Hazırda hücumların nəticələri və mümkün dağıntılar barədə rəsmi məlumat verilməyib. Regionda gərginlik artmaqda davam edir və tərəflərin qarşılıqlı bəyanatları beynəlxalq ictimaiyyət tərəfindən diqqətlə izlənilir.
Mənbə: TrtHaber