İran Futbol Federasiyası 2026-cı il üzrə FIFA Dünya Kuboku 2026 çərçivəsində milli komandanın ABŞ-da keçirilməsi planlaşdırılan oyunlarının təhlükəsizlik səbəbilə Meksikaya köçürülməsi üçün FIFA ilə danışıqlara başlayıb.
Federasiyanın prezidenti Mehdi Taj bildirib ki, mövcud geosiyasi vəziyyət və təhlükəsizlik riskləri bu addımı zəruri edir.
Məlumata görə, bu qərar Donald Trumpın İran millisinin ABŞ-a səfərinin təhlükəsizlik baxımından məqsədəuyğun olmadığı ilə bağlı açıqlamasından sonra gündəmə gəlib. Mehdi Taj qeyd edib ki, əgər komandanın təhlükəsizliyi təmin olunmayacaqsa, İran millisi ABŞ-a getməyəcək və alternativ variant kimi oyunların Meksikada keçirilməsi üçün çalışacaq.
Bununla yanaşı, İranın turnirdə iştirakı hələ də qeyri-müəyyən olaraq qalır. Daha əvvəl ölkənin idman naziri hücumlar fonunda yarışda iştirakın “mümkünsüz” ola biləcəyini bildirmişdi. Federasiyanın Meksika variantı isə turnirdən tam imtina əvəzinə alternativ həll yolu kimi qiymətləndirilir.
Qeyd edək ki, ilkin plana əsasən İran millisi Los Angeles və Seattle şəhərlərində oyunlarını keçirməli idi. FIFA isə məsələ ilə bağlı hələ də rəsmi mövqe açıqlamayıb.
Mənbə: TrtHaber