İran tərəfindən həyata keçirilən raket hücumları nəticəsində İsrail ərazisində yerləşən Ben Gurion Airport hava limanında üç xüsusi təyyarə zərər görüb.
Məlumata görə, Tel-Əvivdə yerləşən və İsraili xarici dünya ilə birləşdirən əsas hava limanında park vəziyyətində olan təyyarələr raket hücumlarının təsirinə məruz qalıb.
İsrail Hava Limanları İdarəsinin sözçüsü bildirib ki, hadisə zamanı üç xüsusi təyyarə əsasən raketlərin qarşısının alınması zamanı düşən qəlpələr nəticəsində zədələnib.
Qeyd olunur ki, təyyarələrdən biri ciddi zərər görərək yanıb, digər iki təyyarədə isə nisbətən yüngül ziyan qeydə alınıb. Hadisə ilə bağlı görüntülər də yerli media tərəfindən yayımlanıb.
Xatırladaq ki, ABŞ və İsrailin fevralın 28-də başladığı hücumlardan sonra İran tərəfi cavab olaraq İsrailə qarşı raket zərbələri endirməyə davam edir.
Mənbə: TrtHaber