Deputat Vüqar Bayramov öz sosial media hesabında 2026-cı ilin ilk iki ayının iqtisadi nəticələrinə dair şərh verib. O bildirib ki, bu dövrdə Azərbaycanda iqtisadi inkişafda qeyri-neft sektoru əsas drayverə çevrilməkdədir.
Bayramov qeyd edib ki, yanvar-fevral aylarında neft-qaz sektorunda ÜDM 1,7 faiz azalsa da, qeyri-neft-qaz sahəsində artım 1,4 faiz olub. Bu, ümumi iqtisadi artımın qorunub saxlanmasına imkan yaradıb.
Deputat vurğulayıb ki, qeyri-neft-qaz sektorunda sənaye sahəsində artım daha nəzərəçarpandır: sənaye istehsalı 7,3 faiz artarkən, enerji sahəsində 0,8 faiz azalma müşahidə olunub. “ÜDM-də olduğu kimi, sənayedə də artım qeyri-neft sektoru hesabına reallaşıb,” – deyə Bayramov bildirib.
O əlavə edib ki, dünya bazarında neftin qiyməti yüksək olsa da, son göstəricilər iqtisadiyyatın diversifikasiyasının prioritet olduğunu təsdiq edir. “Enerji bazarındakı qiymət dəyişikliklərindən asılı olmayaraq, dayanıqlı və inkluziv inkişafın əsası güclü qeyri-neft-qaz sektoru ilə formalaşır,” – deyə deputat qeyd edib.