Mark Rutte ABŞ liderliyinin qlobal təhlükəsizlik baxımından əvəzolunmaz olduğunu bildirib.
NATO-nun baş katibi qeyd edib ki, müttəfiqlərin müdafiə imkanlarını artırması müsbət haldır, lakin bu kifayət deyil. O, xüsusilə müdafiə xərclərinin ÜDM-in 5 faizinə çatdırılması ilə bağlı öhdəliklərə diqqət çəkərək bildirib ki, bu addım alyansın ABŞ-dan həddindən artıq asılılığının qarşısını ala bilər.
Mark Rutte vurğulayıb ki, müttəfiq ölkələr ordularını gücləndirmək və büdcələrini artırmaq üçün sürətli addımlar atır, lakin mövcud vəziyyət daha böyük səylər tələb edir.
Baş katib ABŞ liderliyinin əhəmiyyətinə toxunaraq bildirib ki, “azadlığın istisna deyil, norma olması üçün Amerika liderliyi mütləq lazımdır”. Onun sözlərinə görə, Donald Trump administrasiyasının “sərt güc” siyasəti Avropada uzun müddət davam edən zəifləmə dövrünün aradan qaldırılmasına təsir edib.
Rutte əlavə edib ki, NATO-nun gələcəyi ABŞ və Avropa arasında daha balanslı əməkdaşlıqdan keçir. Onun fikrincə, daha güclü NATO daxilində daha güclü Avropa formalaşmalı və bu, ABŞ liderliyini avtomatik təminat kimi qəbul etməməlidir.
Mənbə: TrtHaber