ABŞ Prezidenti Donald Tramp bildirib ki, Vaşinqton İran ilə atəşkəsi uzatmaq niyyətində deyil və yeni hərbi zərbələr mümkündür.
Tramp CNBC kanalına müsahibəsində qeyd edib ki, ABŞ ordusu daha geniş əməliyyatlara hazırdır. Buna baxmayaraq, o, gələcəkdə tərəflər arasında “böyük razılaşma”nın mümkün olduğunu da istisna etməyib.
Tehran isə Vaşinqtonu atəşkəsi pozmaqda ittiham edir. Abbas Əraqçi bu barədə Sergey Lavrov ilə görüşündə məlumat verib. İran tərəfi ABŞ-ın bölgədə hərbi fəaliyyətini, o cümlədən dəniz blokadasını razılaşmanın pozulması kimi qiymətləndirir.
ABŞ-ın CENTCOM qüvvələri isə 13 apreldən etibarən İran limanlarına giriş-çıxışa nəzarəti gücləndirdiyini açıqlayıb.
Eyni zamanda, İslamabadda ABŞ və İran arasında yeni danışıqlar raundunun keçirilməsi planlaşdırılır. Bu görüşlərin gərginliyi azaltmaq üçün son şanslardan biri olduğu bildirilir.
Ekspertlər xəbərdarlıq edir ki, bölgədə yeni eskalasiya baş verərsə, neft qiymətləri kəskin arta və bir barel üçün 150 dollara çata bilər. Beynəlxalq Enerji Agentliyi də vəziyyəti ciddi enerji böhranı kimi qiymətləndirir.
Mənbə: TASS