Kvinslend ştatında bir sıra məktəblərdə 12-ci sinif şagirdlərinə yekun tarix imtahanı üçün yanlış mövzu öyrədilməsi faktı aşkarlanıb.
Məlumata görə, ən azı səkkiz məktəbdə şagirdlər imtahanda tələb olunan Yuli Sezar mövzusu əvəzinə onun varisi Avqust haqqında material keçiblər.
Hadisə ilə bağlı Kvinslend Kurikulum və Qiymətləndirmə İdarəsi bölgədəki ümumilikdə 172 məktəbdə yoxlamalara başlayıb. Qurumun müvəqqəti rəhbərliyi bildirib ki, məqsəd bu səhvin daha geniş yayılıb-yayılmadığını müəyyənləşdirməkdir.
Rəsmilərin sözlərinə görə, imtahan mövzusu məktəblərə əvvəlcədən – 12 aydan çox əvvəl təqdim olunmasına baxmayaraq, bəzi təhsil müəssisələrində proqram düzgün tətbiq edilməyib.
Qeyd olunur ki, səhvdən təsirlənən məktəblər “xüsusi hallar” proseduru çərçivəsində müraciət edərək şagirdlərin qiymətləndirilməsində əlavə güzəştlər əldə etməyə çalışacaqlar. Bu, imtahan nəticələrinin ədalətli şəkildə hesablanmasına imkan verəcək.
Hadisədən təsirlənən məktəblərdən biri də Brisbane Dövlət Liseyi olub. Məktəbdə iki sinif üzrə şagirdlərə imtahan öncəsi əlavə dəstək proqramı təşkil edilib.
Təhsil Departamenti baş verən səhvə görə üzr istəyərək bildirib ki, şagirdlərin nəticələri qiymətləndirilərkən bu vəziyyət mütləq nəzərə alınacaq.
Qeyd edək ki, Avqust eramızdan əvvəl 44-cü ildə sui-qəsd nəticəsində öldürülən Yuli Sezarın övladlığa götürülmüş oğlu və varisi olub və sonradan Roma imperiyasının ilk imperatoruna çevrilib.
Mənbə: TheGuardian