Bugun.tv xəbər verir ki, ABŞ Mərkəzi Komandanlığı (CENTCOM) İranın Hörmüz boğazında ABŞ hərbi gəmisinə uğurlu hücum etməsi barədə yayılan məlumatları təkzib edib.
CENTCOM-un yaydığı açıqlamada bildirilib ki, bəzi İran media orqanlarında ABŞ hərbi gəmisinin vurulması ilə bağlı yayılan xəbərlər həqiqəti əks etdirmir.
“İran media mənbələri iddia edir ki, İran Hörmüz boğazında ABŞ hərbi gəmisinə hücum edib. ABŞ-ın heç bir hərbi gəmisi vurulmayıb”, – deyə açıqlamada qeyd olunub.
Bundan əvvəl İranın Nournews agentliyi Vaşinqtonun son hücumlarına cavab olaraq Yaxın Şərqdə yerləşən ABŞ hədəflərinə zərbələr endirildiyini bildirmişdi. Məlumata görə, hədəflər arasında Hörmüz boğazında yerləşən ABŞ hərbi gəmiləri də olub.
ABŞ və İran arasında son günlər artan gərginlik fonunda tərəflər qarşılıqlı bəyanatlar verməyə davam edir. Rəsmi Vaşinqton İranın hücumlarla bağlı iddialarını rədd etsə də, bölgədə vəziyyətin gərgin olaraq qaldığı bildirilir.
Mənbə: TASS