Bugun.tv xəbər verir ki, astronomlar başqa bir planeti müşahidə edərkən təsadüf nəticəsində Yer kürəsindən birbaşa görüntülənə bilən indiyədək ən zəif ekzoplaneti kəşf ediblər.
Avropa Cənub Rəsədxanasının Çox Böyük Teleskopu (VLT) və James Webb Kosmik Teleskopunun məlumatlarını təhlil edən tədqiqatçılar “Beta Pictoris d” adlandırılan yeni planeti müəyyən ediblər. Təxminən 64 işıq ili uzaqlıqda yerləşən Beta Pictoris sistemi cəmi 23 milyon il yaşı olan gənc ulduz sistemi hesab olunur.
Alimlərin bildirdiyinə görə, yeni kəşf edilən planet Yupiterdən təxminən 2,4 dəfə böyükdür və səth temperaturu təxminən 330 dərəcə Selsi təşkil edir. Planet öz ulduzunun parlaq işığı səbəbindən uzun müddət müşahidə edilə bilməyib. O, sistemdə daha əvvəl aşkarlanan Beta Pictoris b planetindən təxminən 100 dəfə daha zəif işıq saçdığı üçün ulduzun parıltısı içində gizlənirdi.
Mütəxəssislər bildirirlər ki, inkişaf etmiş teleskop texnologiyaları və yüksək sürətli görüntüləmə üsulları sayəsində bu maneəni aradan qaldırmaq mümkün olub.
Astronomların fikrincə, eyni sistemdə bir neçə planetin birbaşa müşahidə olunması onların necə formalaşdığını və fərqli xüsusiyyətlər qazandığını anlamaq baxımından böyük əhəmiyyət daşıyır. Gələcəkdə istifadəyə veriləcək yeni nəsil teleskopların daha kiçik və daha zəif planetləri də aşkar edəcəyi gözlənilir.
Mənbə: TrtHaber